ورشة الحواس الخمسة
أولا عشان الأطفال يسمعوني لعبت معاهم لعبة الصمت أو الهدوء وعرفوا إنهم عشان يسمعوا الأصوات الموجوده حولهم لازم يسكتوا وممكن تعملوها بوقت دقيقة أو أكثر الكل يسكت ويركز إيه الأصوات الموجودة حواليهم ممكن دقات عقارب الساعة وهكذا
ثانيا جبت تفاحة وطبقنا عليها كل الحواس .. بنشفها بإيه ؟ .. بعرف ريحتها بإيه ؟ .. بتذوقها بإيه ؟ .. بلمسها بإيه ؟ .. وبسمع صوت أسناني وهي بتاكلها بإيه ؟
وعرفنا إن عندنا ٥ حواس وممكن تطبقوها على أي حاجة وتشوفوا كام حاسة هتقدروا تستخدموها مع الحاجة دي
ثالثا .. حاسة التذوق
عملنا أنشطة تذوق والتعرف على نوع الفاكهة بحاسة الشم والتذوق وغمضنا العين والطفل كان بيحاول يعرف هو أكل إيه
ولما كان بيقول أكلت تفاحة أقوله تفاحة طعمها حلو .. أزود وصف الطعم هل هو حلو ولا مالح ولا حامضي ولا مر
وفي أطفال تذوقوا ليمون وعرفزا انه حامضي واليوسفي أيضا
الدواء بيكون مر .. الكاكاو الخام .. البن كل ده مر
ممكن تعملوا تجربة تجيبوا .. حاجة حلوة .. مالحة.. حامضة .. مر ويذوق ويشوف فين أكثر مكان في لسانه بيحس فيه بالطعم
رابعا .. حاسة السمع
لعبنا .. اتعرفنا على مجموعة أصوات وعرفنا اسم الآلة وبعد كده كنت بستخبى أعمل صوت وهما بدون ما يشوفوا يحاولوا يعرفوا نوع الآلة
وعرفنا إن في أصوات عالية بتؤذي الأذن وفي أصوات هادئة وجميلة وجربوا الآلات بنفسهم
ممكن تنزلوا تطبيق من الموبايل عليه أصوات حيوانات .. حشرات .. طبيعة زي ماء .. صوت البحر .. صوت الشجر .. وهكذا بدون ما يشوفوا يخمنوا الصوت
وتتكلموا معاهم عن نعمة السمع وإننا نساعد من لايتمتع بهذه النعمة
وإننا نحافظ على أذننا .. لا نضع بها أي شيء مطلقا
وعرفوا من الجرس إنه عشان يطلع منه صوت لازم يحدث تصادم
خامسا .. حاسة اللمس
شنطة غير شفافة وجواها حاجات مختلفة اسمها لعبة الكيس الغامض .. الطفل يلمس الأشياء دون أن يراها والطفل يحاول يوصفها .. مثلا صلبة ولا لينة (لازم يكون عارف الفرق قبل النشاط ده ) .. خشن ولا ناعم .. صغير أم كبيروهكذا .. انت بتحاولي تساعديه إنه يتعرف مسك إيه ..
ومسكوا كوز الصنوبر وعرفوا إنه خشن .. والمنديل ناعم .. المكعب صلب .. الصوف لين .. الريشة ناعمة
في أنشطة تانية تعملوها معاهم
نشاط مطابقة الملمس بدون أن يرى الطفل يحاول يجد زوجين متطابقين .. يلمس واحد ويحاول يجد واحد مماثل له في الملمس
في نشاط كمان ممكن تدوروا عليه .. مربعات ورق الصنفرة
أي حاجة عندك تعملي منها اتنين .. حتةدى لو تلزقي رمل على كرتونه .. قشر بيض .. أرز .. أي أقمشة
اللمس ده بنستخدمه في حاجات كتير في حياتنا . وإحنا بنسلم على حد .. واحنا بنطلع السلم .. واحنا بنسرح شعرنا .. كل واحد ليه بصمة مختلفة
ممكن تعملوا لوحة لمس لأشياء مختلفة
ونتكلم على نعمة الجلد وازاي نحميه من الشمس ونهتم بنظافته بالاستحمام وغسل الأيدي
وتعملوا معاهم تجربة لمس سوائل بدرجات حرارة مختلفة .. ثلج .. بارد .. من الحنفية .. دافئ .. ساخن ( مش أوي بدون أذى ) ..
ونعرف إن حاسة اللمس بتحمينا لو لمسنا حاجة سخنة هتلاقي إيدك بعدت بسرعة وده من نعمة ربنا علينا.
بنحس لو نملة قصتنا .. بنحس لو الجو برد فنلبس ندفي جسمنا
سادسا .. حاسة الشم
بعض الزجاجات فيها قطنة وعليها رائحة والطفل يتعرف عليها
زي ماء ورد .. نعناع .. عطر .. فانيليا .. ليمون .. كولونيا - بن
وممكن حاجات صلبة من غير قطنة زي قرفة ..قرنفل .. قشر برتقال او ليمون .. ينسون .. كمون .. بشرط أن لايرى الطفل ما داخل العلبة
تطوير النشاط بتجيبي ١٢ علبة أي حاجة تنفع تكون مش شفافة ٦ بلون و ٦ بلون والطفل يطابق بين واحدة من المجموعة دي مع واحدة من المجموعة دي
سابعا .. حاسة البصر
عرفنا ان في حاجات بنستخدم فيها حاسة النظر رؤية السحاب القمر الشمس النجوم .. ولو في حاجات بعيدة بستخدم منظار مثلا يقربها .. وإننا بنعرف الألوان بحاسة النظر وجربوا نظارة عدستها حمرا وجربوا المنظار
https://www.pinterest.com/pin/432908582929236637/
https://crisscrossapplesauce.typepad.com/files/five-senses-picture-sort.pdf
صورة لنشاط ممكن نطبق مثله بالصور دي
ليست هناك تعليقات:
إرسال تعليق